Main Menu

KAMATA NGAUE ‘A E ‘ATENI SENIALE FO’OU ‘I HE ‘AHO 4 SUNE

Mrs Linda Simiki Folaumoetu'i ...new Attorney General

Nuku’alofa – 3 Me, 2019: 10am (Nuku’alofa Times): ‘Oku loto ‘a e ‘Ofisi ‘o e ‘Ateni Seniale ke fakaha ki he hou’eiki mo e kakai ‘o e Fonua, ko e ‘Ateni Seniale fo’ou, Linda Simiki Folaumoetu’i SC, ‘e kamata ngaue mo fakahoko hono ngaahi ngafa mo e fatongia ko e ‘Ateni Seniale ‘o e Pule’anga ‘o Tonga mei he ‘aho Tusite 4 ‘o Sune 2019.

Ko e kamata ngaue eni ‘a Linda Simiki Folaumoetu’i SC, ‘o fakatatau pea mo hono fakanofo ia ‘i he ‘aho Tu’apulelulu 21 Ma’asi 2019, ‘e he ‘Ene ‘Afio Kingi Tupou VI, hili ‘a e ma’u ‘a e fale’i mei he Penolo ki he Ngaahi Fakanofo mo e Tu’utu’uni Fakafakamaau pea mo e Fakataha Tokoni ‘o ‘Ene ‘Afio.

Hili hono fakanofo ‘o Linda Simiki Folaumoetu’i SC, na’e fiema’u ke ne ‘uluaki fakahoko ‘a e founga ngaue ke fakangata hono faka-ngaue’i ia ‘i he ‘Ofisi ‘o e ‘Omipatimeni ko e Pule Ngaue, kimu’a pea ne malava ke kamata ngaue ‘i he’ene ngaue fo’ou ‘i ‘Ofisi ‘o e ‘Ateni Seniale.

‘E hoko ‘a Linda Simiki Folaumoetu’i SC ko e ‘Ateni Seniale hono 10 ia talu mei hono fokotu’u ‘a e ‘Ofisi koia ‘i he 1988 ‘e he ‘Ene ‘Afio kuo Ungafonua, Tama Tu’i ko Taufa’ahau Tupou IV.

‘E ngata leva ‘a e fakahoko fatongia ‘a e ‘Ateni Seniale Le’ole’o lolotonga, ‘Asipeli ‘Aminiasi Kefu SC, ‘i he ngata’anga ‘o e ‘aho Monite 3 Sune 2019.






Comments are Closed