Main Menu

Tu’utu’uni ki he Fokotu’utu’u Ngāue Fakapa’anga

nrbt

Nuku’alofa – Me 7, 2019: 12pm (Nuku’alofa Times): Na‘e tali ‘e he Poate ‘a e kau Talēkita ‘a e Pangikē Pule Fakafonua ‘o Tonga´ hili ‘enau fakataha ‘i he ‘aho 30 ‘o ‘Epeleli 2019, ke kei hokohoko atu ai pē ‘a e ngaahi tu’utu’uni ngāue fakapa’anga lolotonga´ ‘a ia ‘oku hā atu ‘i lalo´.

‘Oku fakataumu’a eni ke ngāue’aki ‘a e hulu ‘i he pa’anga ngāue ‘a e ngaahi pangikē, ki hono tuku atu ‘a e ngaahi nō ki tu’a ke ne faka’ai’ai mo pātoloaki ‘a e tupu faka’ekonōmika ‘a e fonua´

a. Ke kei hoko atu pē hono ta’etotongi ha tupu (interest) ‘i he ngaahi ‘akauni pa’anga ngāue ‘a e ngaahi pangikē´ (Exchange Settlement Account) ‘oku fakahū ‘i he Pangikē Pule´ (zero interest rate policy);

e. Ke ‘oua ‘e toe ma’ulalo hifo ‘i he peseti ‘e 80 ‘a e lahi e ngaahi nō ‘oku tuku atu ‘e he ngaahi pangikē ‘o fakahoa ki he lahi ‘o ‘enau ngaahi fakahū pa’anga´ (loans/deposit ratio);

f. Ke kei tauhi pē ‘a e lahi ‘o e pa’anga ‘a e ngaahi pangikē fakakomēsiale, ‘a ia ‘oku tu’utu’uni fakalao ke tauhi ‘i he Pangikē Pule´ (Statutory Reserve Deposit) ‘i he peseti ‘e 10; pea

h. Ke tu’uma’u pē ‘a e tu’unga ’o e hikihiki ‘i he totongi ‘o e ngaahi koloa´ (inflation reference rate) ‘i he peseti ‘e 5.

Na’e fakahā ‘e he Kōvana ‘o e Pangikē Pule´, Sione Ngongo Kioa, ‘i he’ene lipooti fekau’aki mo e tu’unga lolotonga ‘o e ‘ekonōmika ‘a e fonua´, ‘oku hā mai ai ‘a e fetō’aki ‘a e ngaahi ngāue faka’ekonōmika fakalotofonua´ ki he mahina ko Fepueli.

Na‘e kake ‘a e uta atu ki muli ‘o e ngoue´ ‘aki ‘a e toni ‘e 31.3 makatu’unga mei he lahi ange hono ‘uta atu ‘o e ngoue foha΄ hange ko e manioke mo e ‘ufi. Kaekehe, na’e ‘ikai hoamalie eni mo e holo ‘a e pa‘anga hū mai mei hono uta atu ki muli ‘o e ngoue ‘i he mahina ‘o ha mai mei ai ‘a e toloi hono ma’u mai ‘o e pa‘anga hū mai mei he uta atu ‘o e ngoue΄.

Na’e māmālie ‘a e ngaahi ngāue langa΄ ‘i Fepueli, ‘o hā mei heholo ‘a e ngaahi nō ki he tafa’aki langa fakapisinisi´. ‘I he taimi tatau, na’e hiki si’i e ngaahi nō fale taautaha´. Na’e holo ange ‘a e ngaahi koniteina na’e lesisita΄ ka etautefito ki he ngaahi koniteina fakataautaha.

Na‘e holo ‘a e pa‘anga hū mai mei he fefolau‘akiˊ, ‘o fenāpasi ia mo e holo ‘i he tokolahi ‘o e kakai na’e tū‘uta vakapuna mai ki Tonga΄ni. Na’e lahi ange hono ngaue’aki ‘a e ‘uhila ‘i Fepueli ‘o fenapasi mo e hiki hake ‘a e ngaahi konisiuma ki he ‘uhila.

‘Oku kei ‘i he tu‘unga lelei pē ‘a e fai fatongia ‘a e ngaahi pangikē fakakomēsiale´, ‘a ia ‘oku kei hokohoko atu pe ‘a e mālohi fe’unga pē ‘a e ivi ‘enau pa’anga ngāue´ pea ’i he tu‘unga fakafiemālie pē ‘a ‘enau ngaahi tupu´ (profitability).

Na’e kake ‘a e pēseti ‘o e ngaahi nō ‘i hono fakahoa ki he lahi ‘o e ngaahi fakahū pa‘anga´ (loans/deposit ratio) ‘i he māhinaˊ ni ki he pēseti ‘e 76.0 mei he peseti ‘e 74.8 ‘i he mahina kuo ‘osi΄.

Na’e makatu’unga ‘a e hiki ‘i he māhinaˊ mei he holo ange ‘o e fakahū pa‘anga´ ‘i he ngaahi nō na’e tuku atu´.

Neongo ‘oku kei ma’ulalo pē ‘eni ‘i he pēseti ‘e 80 kuo tu’utu’uni’i ‘e he Pangikē Pule´ ke a’usia ‘e he ngaahi pangikē fakakomēsiale´, kā ‘oku mahino mai ‘oku ‘i ai ‘a e fakalakalaka kimu’a ’a e tu’unga ko eni´ ‘i he ta’u´, ‘aki ‘enau nō atu ki tu’a ‘a e hulu ‘i he’enau pa’anga ngāue´.

Na‘e hiki hake mo e ‘avalisi ‘o e totongi tupu ‘i he nō mo e fakahū pa’anga´ (weighted average interest rate spread) ‘i Fepueli tupu pea meiˊ he hiki ‘i he ‘avalisi ‘o e totongi tupu ‘i he nō (weighted average lending rate) mo e ‘avalisi ‘o e totongi tupu ‘i he fakahū pa‘anga´ (weighted average deposit rate).

Na’e holo hifo ‘a e tu’unga ‘o e pa’anga talifaki ‘i muli´ (foreign reserves) ‘aki ‘a e $5.5 miliona ki he $473.5 miliona, ‘o fe‘unga ia mo e māhina ‘e 7.9 ‘o e koloa mo e ngaahi ngāue hū mai mei muliˊ.

Na’e makatu’unga ‘a e holo ko eni mei he lahi ange ‘a e ngaahi totongi ki he koloa hū mai mei tu’apule’anga. ‘I Fepueli 2019 ko e hikihiki ‘i he totongi ‘o e koloa fakalukufua na’e kei ma’ulalo pe ia ‘i he lekooti ‘i hono hiki’aki ‘a e peseti ‘e 3.2.

Ko e hikihiki ‘i he totongi koloa fakaloto fonua mo e totongi koloa hū mai na’e makatu’unga ia mei he kau kiai ‘a e poini fakapeseti ‘e 3.8 mo ‘ene holo ‘i he poini fakapeseti ‘e 0.5 ki he hikihiki fakata’u ‘i he totongi koloa.

Ko e hiki ‘i he ta’u he totongi koloa fakalotofonua na’e makatu’unga ‘i he totongi ‘o e koloa me’akai, tapaka, falekai mo e hotele pea ko e koloa hu mai leva na’e holo ia makatu’unga mei he ma’ulalo ‘a e totongi ‘i he sekitoa fefononga’aki mo e tafa’aki ki he ngaahi ngāue.

‘Oku fakafuofua ‘e he Pangikē Pule´ ‘e kei tupu pē ‘a e tu’unga faka’ekonōmika ‘a e fonua´ ‘i he kaha’u´, kā ‘e malava uesia ‘a e fakafuofua ko ‘eni´ mei he ngaahi feliuliuaki ‘i he tu’unga ‘o e ‘ea´.

Ko e pa‘anga talifaki ‘i mulí´ ‘oku fakafuofua ‘e kei ‘i he tu’unga fakafiemālie pē, pea ‘oku ‘amanaki ‘e hokohoko atu ai pē ‘a e holoholo ‘o e hikihiki ‘i he totongi koloaˊ ke ma’ulalo pē he pēseti ‘e 5.

Ko e ngaahi pangikē ‘oku fakafuofua te nau kei ‘i he tu’unga fakafiemālie pē. Makatu’unga pea mei he ngaahi fakamatala kuo fakahā atu ‘i ‘olunga´, ‘oku kei taau ke hokohoko atu pē ‘a e ngaahi tu’utu’uni ngāue fakapa’anga lolotonga´.

‘Oku kei fakahoko pē ‘e he Pangikē Pule´ hono siofi ke fakahoko ha ngaahi fokotu‘utu‘u ngāue te ne faka’ai’ai ‘a hono ngāue’aki ‘a e hulu ‘i he pa’anga ngāue ‘a e ngaahi pangikē, ke nō atu ki he ngaahi ngāue faka’ekonōmika fakalotofonua´, ke poupou mo pātoloaki ha tupu faka’ekonōmika ‘oku ma’uma’uluta mo tolonga.

‘Oku kei hokohoko atu ai pē ‘a e tokanga ‘a e Pangikē Pule´ ki hono muimui’i ofi e ngaahi fakalakalaka faka’ekonōmika fakalotofonua´ mo fakatu’apule’anga´, mo tu’u mateuteu ke liliu ‘a e ngaahi fokotu’utu’u ngāue fakapa’anga´ ‘o ka fiema’u.






Leave a Reply

Your email address will not be published. Required fields are marked *